Bakının daşınmaz əmlak bazarında da vəziyyət dəyişdi…

Manatın kəskin ucuzlaşması daşınmaz əmlak bazarında da öz güclü təsirini göstərməyə başlayıb. AgahMedia.Com informasiya portalının Fins.Az resursuna istinadən məlumatına görə,  mənzil satışı ilə məşğul olan şəxslər və daşınmaz əmlak üzrə ekspertlər bildirirlər ki, mənzillərin manatla qiymətləri orta hesabla 25% artıb. Maklerlər deyirlər ki, ev, mənzil almaq istəyənlər qəfildən çoxalıb, lakin satanlar qiymətləri dollara çeviriblər və nəticədə 20-30%-lik bahalaşma əmələ gəlib.

Əmlak bazarı üzrə ekspert Ramil Osmanlının sözlərinə görə, son vaxtlar bu sahədə ucuzlaşma var idi, amma baş verən proseslərdən sonra bazarda vəziyyət dəyişib: “Manatın məzənnəsinin kəskin enməsi, eləcə də daşınmaz əmlakla bağlı yeni verigilərin qoyulması vəziyyəti dəyişib. Hazırda, bazarda qiymət artımı müşahidə olunur”.

R.Osmanlının fikrincə, mənzil və torpaq sahələrinə tələbin azalması fonunda əslində qiymətlərdə azalma olmalı idi: “Amma nəzərdən qaçırmayaq ki, vergi öhdəliklərinin satış qiymətinə əlavə olunacağı halda artma ehtimalı da yaranır. Artıq manatla təklifə çıxarılmış mənzillərdə qiymətlər dollara dəyişdirilib, həm də bir qədər də artırılmış şəkildə. Bu isə faktiki olaraq 25-30%-lik bahalaşma deməkdir”.

Azərbaycan Rieltorlar Assosiasiyasının prezidenti Vəfadar Axundovun sözlərinə görə, manatın məzənnəsinin kəskin düşməsi ilə bağlı ev və mənzillər 25-30% bahalaşıb. Mütəxəssis deyir ki, manatın məzənnəsinin daha da düşəcəyini güman edən alcılar kütləvi şəkildə ev, mənzil almağa başlayıblar ki, bu da bazarda tələbatı kəskin artırıb və nəticədə qiymətlərin xeyli bahalaşmasına gətirib çıxarıb.
“İndiyədək qiymətlərdə azalma müşahidə olunurdu, çoxları gözləyirdi ki, bir az da ucuzlaşsın, sonra mənzil alsın. Lakin yaranmış məlum vəziyyət onların əllərində olan pulu hamısını daşınmaz əmlaka, xüsusən də mənzil alışına yönəltmələrinə səbəb olub.”

 “Satışda olan yeni və köhnə mənzillər sürətlə alınır. Əvvəldən beh verənlər manat ucuzlaşan kimi gəlib pulun qalanını da ödəyib mənzilləri alırlar. Hazırda “novostroyka”larda qiymətlər 20-30% arasında bahalaşıb. Əgər vəziyyətə müdaxilə edilməsə, bahalaşma prosesi dayanmayacaq”.

Bu kontentin portalımızda yayınladığı tarix : 23/02/2015

Ucuz təyyarə biletləri və sərfəli otellər burda... ⇒

Sərfəli qiymətlərə satılıq evlər, torpaqlar və obyektlər ... ⇒