Bakıda növbəti Beynəlxalq İnşaat Sərgisi keçiriləcək…

22-25 oktyabr tarixlərində Bakı Ekspo Mərkəzində 25-ci dəfə Azərbaycanın ən irimiqyaslı sərgilərindən biri – Azərbaycan Beynəlxalq İnşaat “BakuBuild” Sərgisi keçiriləcək.

AgahMedia.Com informasiya portalının sərginin təşkilatçısı olan “Caspian Event Organisers” şirkətindən aldığı məlumata görə, 1995-ci ildə təsis edilmiş bu sərgi 25 illik uğurlu fəaliyyəti ərzində dünyanın 35-dən artıq ölkəsini təmsil edən 5000-dən çox şirkəti bir araya gətirib. Bu müddət ərzində sərgi bütün Xəzəryanı regionun inşaat bazarı üçün etibarlı işgüzar platforma kimi özünü sübut edib. Sərgidə işgüzar əlaqələr qurulur, inşaat sənayesi üçün innovativ texnologiya və avadanlıqlar nümayiş etdirilir. “BakuBuild” sərgisi fəaliyyət göstərdiyi illər ərzində ölkə bazarında yeni texnologiyaların tətbiqinə və yerli istehsalı inkişaf etdirən və təkmilləşdirən investisiyaların cəlb olunmasına şərait yaradıb. Bir çox şirkət uzun illərdir ki, sərgidə iştirak edərək öz tarixini sərginin tarixi ilə bölüşür.

“BakuBuild” sərgisi öz yubileyində Avropa, Asiya və MDB ölkələrini təmsil edən 200-dən çox şirkəti bir araya gətirməklə, iştirakçıların beynəlxalq əlaqələrini daha da gücləndirmək niyyətindədir. Sərgidə Almaniya, BƏƏ, İran, İtaliya və digər ölkələrin milli qrupları iştirak edir.
Türkiyə ilk dəfə olaraq sərgidəmilli qrupla çıxış edəcək.
Rusiya isə öz regional stendləri (Kirov, Kurqan, Lipetsk, Samara, Smolensk, Tümen, Vladimir vilayətləri, eləcə də Başqırdıstan, Qaraçay-Çərkəz, Mordoviya, Şimali Osetiya-Alaniya) ilə sərgidə debüt edəcək.
İştirakçılar arasında “Assa Abloy”, “AZROS-PL”, “JAF”, “Caspian Electric”, “Faxreddin-K”, “Nabucco”, “NB Group”, “Pimapen”, “Kronospan”, “Taleh-I”, “Universal Makina”, “Akkord Cement” (Qazax sement zavodu), “Texnonikol” və s. şirkətlər yer alır. Sərginin daimi iştirakçısı – “NB Group” şirkəti qeydiyyat sponsoru qismində çıxış edir.

“BakuBuild 2019” sərgisində inşaat materialları, dam örtükləri və izolyasiya, eləcə də interyer, bəzək materialları, dizayn, boya, lak və döşəmə örtükləri, landşaft memarlığı və dizaynı, fasad, qapı-pəncərə, işıq və elektrotexniki məhsullar, inşaat avadanlıqları və texnologiyaları kimi sektorlar ilə tanış olmaq mümkün olacaq.

İştirakçılar sərginin peşəkar ziyarətçilərinə inşaat sənayesinin ən son yenilik və nailiyyətlərini əyani şəkildə nümayiş etdirəcək, sərginin qonaqları isə təqdim edilən məhsulları birbaşa sərgidə sınaqdan keçirə biləcəklər.
Beləliklə, “BakuBuild” sərgisi yeni loqotip və böyük tarixi ilə müasir biznesin inkişaf təmayülləri ilə ayaqlaşaraq, qısa vaxt ərzində hədəf auditoriya ilə üzbəüz görüşlər keçirməyə və yerində və dərhal biznes qurmağa imkan yaradır.

Sərgi Azərbaycan Respublikasının İqtisadiyyat Nazirliyi, Azərbaycan Respublikası Dövlət Şəhərsalma və Arxitektura Komitəsi, Azərbaycan Respublikasının Mənzil İnşaatı Dövlət Agentliyi, Azərbaycan Respublikasının Kiçik və Orta Biznesin İnkişafı Agentliyi, Azərbaycan Memarlar İttifaqı, Azərbaycanda İxracın və İnvestisiyaların Təşviqi Fondu, Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK) tərəfindən dəstəklənir.

Bu kontentin portalımızda yayınladığı tarix : 20/10/2019

Ucuz təyyarə biletləri və sərfəli otellər burda... ⇒

Sərfəli qiymətlərə satılıq evlər, torpaqlar və obyektlər ... ⇒