Home » Sosial, Təhsil sektoru, Ümumi » Jurnalistikanın hüquqi inkişafı ilə ilgili təlimlərə start verildi

Jurnalistikanın hüquqi inkişafı ilə ilgili təlimlərə start verildi

Avropaya İnteqrasiya Mərkəzi (AİM) İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə “Ali məktəblərdə jurnalistika təhsilinin və informasiya-kommunikasiya strategiyalarının inkişafına dair hüquqi təşəbbüslər” adlı layihənin icrasına başlayıb. AgahMedia.Com informasiya portalının İctimai TV-yə istinadən məlumatına görə, layihənin əsas məqsədi ali məktəblərdə media və informasiya-kommunikasiya azadlıqları, internet jurnalistikası üzrə müasir beynəlxalq və milli hüquq normaları barədə maarifləndirmə tədbirlərinin təşkili ilə ölkəmizdə təhsilin və müasir media mədəniyyətinin inkişafına ictimai dəstək verməkdir. Eyni zamanda, layihə üzrə “Beynəlxalq hüquq və Azərbaycan Respublikasının media qanunvericiliyi” kitabının (dərs vəsaitinin) çap olunaraq jurnalistika ixtisaslı tədris ocaqlarında və geniş ictimaiyyət arasında yayımı da nəzərdə tutulur.
Layihə çərçivəsində media hüquq ekspertlərinin, jurnalistlərin və tələbələrin iştirakı ilə Azərbaycan Universitetində “Müasir jurnalistika, informasiya-kommunikasiya strategiyaları və KİV-in inkişafına dair beynəlxalq və milli hüquq normaları: müqayisəli təhlillər və modernləşmə istiqamətləri” mövzusunda ilk seminar keçirilib. Tədbirdə müasir Azərbaycan jurnalistikasının modernləşməsinə xidmət edən layihə üzrə qarşıya qoyulan hədəflərdən danışılıb, informasiya-kommunikasiyalarının, internetin, elektron medianın ictimai fikrin formalaşmasında və dövlətin möhkəmlənməsində xüsusi rolunu nəzərə alaraq, bu sferada hüquqi öhdəliklərin, beynəlxalq və milli qanunvericilik normalarının müqayisəli araşdırılması və öyrənilməsinin əhəmiyyətini vurğulanıb. Müasir jurnalistikamızda və milli media qanunvericiliyində mövcud olan diffamasiya, internet hüququ, şərəf və ləyaqətin müdafiəsi, şəxsi həyatın mühafizəsi ilə bağlı yeni transmilli anlayışlar barədə tələbələrə ətraflı məlumat verilib, informasiya-kommunikasiya azadlığına dair xarici ölkələrin qanunvericiliklərinə, beynəlxalq konvensiyalara və Avropa Məhkəməsi təcrübəsinə əsaslanaraq məlumat azadlığının məhdudlaşdırıldığı sahələr, habelə bu azadlığın digər insan haqları ilə qarşılıqlı əlaqəsi, eləcə də medianın hazırki qloballaşma və Avropaya inteqrasiya proseslərində mühüm önəmi barədə faydalı fikir mübadiləsi aparılıb. Seminarda həmçinin, milli jurnalistikada yeni KİV modellərinin formalaşması zərurətindən irəli gələn modern hüquqi imkanlardan istifadə məsələləri ilə bağlı dinləyiciləri maraqlandıran suallara aydınlıq gətirilib.

Sizin paylaşım ve yorumlarınız (şərhləriniz) AgahMedia.Com portalı için önemlidir!...

Bir cevap yazın

E-posta hesabınız yayımlanmayacak. Gerekli alanlar * ile işaretlenmişlerdir

*